2Th 2 | BEF | STEP | Lalalutigita, Sipi Boti Yesu Kilisitou alina kana'a to aitoga lele'mo nupa hilina kana'a yamofihi kaga'a lu lepilugi kehelilo. Nani lenegekesa li hokolo huto lu lepilugi keheli fe lite minalo.

2 Thessalonians 2

Foipa hulata kene'i mone huto hilinamofihi ka'a

1 Lalalutigita, Sipi Boti Yesu Kilisitou alina kana'a to aitoga lele'mo nupa hilina kana'a yamofihi kaga'a lu lepilugi kehelilo. Nani lenegekesa li hokolo huto lu lepilugi keheli fe lite minalo. 2 Bona'i mone'amagi Sipi Bouba alina kana'a ao'ehibe lite lu lepilenogo mekehelilo. Enali mone'amagi Hu'mamofihi baga'aguti kaga yabe lilana, faga yabe. To mone'amagi ya lite mono ka lu yege hilana, faga yabe. To mone luga'amagi lali ya luto fayanugu koyo'ohuta yabe lilana, faga yabe. To ya'ma kaga lu nelinogomo lenali mele'isi keheli topa hete lenuluhaya metino. To lenegekesa yigise'namofihi ya'ma keheli sibi sibi hite meminalo. 3 Kaga yamofihi nelite lelite tite lenele'mo topa he lalagi ya'mu ya'ma lite kehelilo. Yata'a hapi fito Hu'mamofihi luba li emilatanamofihi huto hulenogo to sipi foipa bouba, Sataha naga'i nohina bo ai logo hepa'i lilube'mu hina bo ai huto hulenogo yalo alihi Sipi Botimofihi kana'a huto hilina'mu yabe. 4 Ana foipa bouba ai bona'magihi keheligo bati'na lolo hulata nohina nasana to bona'magi liyafa nehana nasana silaga'i yamofihi le'mo laba huloto'a to enali folagaha'aniguti yamofihi ai'a gufa'a lelito ai'a tilube'mu hibe. Ya huloto Hu'mamofihi sipi mono nonugu tito minoloto ai kumu ma luto kehelilibe. Nani'ni Hu'mamofita nohube lilibe. Ya luto kehelilibe.

5 To ya'ma hilina'a ananamomu'i nani'ni lenalitoga minoto ka'a lu lepi lepi hu'ohuna keheli'ahana ni'ifiye? 6 To Hu'mau yatai ana foipa bomofihi kapo'a hekini lo'ehina keheli'ahabe. Alihi kana'alo olenogo ana foipa bouba huto hilibe. 7 Yatai kanagu foipana lilata nehanamofipo suguna foya lilata nohinamo ni'igi Hu'mamofihi Sikalafu'uba kapo'a fi hekini lolata nohinamofihi kana su holenogo ai le'mo gulu hago ya'ma sipi foipa bo huto hilibe. To ya'ma kanagu foipana gofana huto hilina'mu yabe. 8 To foipa bo huto hulenogo Sipi Bo Yesu bagaguti mutiya'auba ho fililina'mu yabe. Sipi Bo nehetilina yupahi besana'a hiti silifisa maloha'a hiti nooto foipa bomo le'mo sibina hilina'mu yabe. 9 Ya'ma foipa bouba Satahi amuya'a hiti nehetito fato fato'mofihi amuya nasana hiti topa hose nasana hiti silaga'i fi taga hu epoloto li huto hilibe. 10 Ya huloto bona'i luga'a faga faga nasana babu luto yamofihi fato fato suhi foipanamofihi nasana lito enimi'i moloto logo hepatoga enele'moto bilibe. Enali ka lamana'amo kehelite lagati melebesibe lite enemegesa hi emi'ehinogo Hu'mau ana huto enubuto mebilina'mu yabe. 11 Ana bona'magi ya hilata nehago Hu'mau fi taga hu epololatanamofihi ito'afu enalitoga le'mo huto hulago yamofihi faga fagagu bite i ke'malana'mu yamofihi fa'mene bite i ke'malabe. 12 To hetofa kaga'a enemegesa hi emite foipa nasanauba laga epesina bona'magihi enalitoga foipana sipi'a enali enugupisalo tilube'mu higo Hu'mau sipi huto enahalina'mu yabe.

Lubuto bilube luto Hu'mau lele'mo eto nohibe

13 Lalalutigita, Sipi Bouba mehi lepi'ehina bona'ise. Hu'mau lenele'mo eto hu'ehina'mu luto lenali kohe toto lenubuto bilube luto Sikalafu'uba amuya'a hiti komopatini le'mo bati huto bona'ni lolo hu epalalube luto ligo hetofa kaga'agu bite i ke'me'ahago yana'mu lenali kumu asaga yupahi Hu'mamofihi legelo bilata nohune. 14 To Hu'mau ya'ma Sipi Boti Yesu Kilisitohi kogonalina'amofihi fana meha'a lilabe luto lenali kumu kehe ito lenele'mo eto hu'ehina yabe. Ya'ma ka lamana'a lu yege hoto lepi'ohutana ya luto kehe igo lenali keheli'ahana. 15 Ya'mu lalalutigita, labagaguti kaga to fayahi koyoto lepi'ohuta kaga li pili kete ule'ale hite minalo.

16 To Sipi Boti Yesu Kilisito ai, to afotifu Hu'mau, lenali komopatinigu lenele'mo bati bati hinogo kolina'a meminana bona'i lolo hilabe nolube. To ai lenele'mo amuya hinogo lenali hetofa suhi hulata hite to hetofa kaga lulata hite minalabe luto nolube. Ai Hu'mau mehi limi'ehina bouba, to fa'mene lehe'moto komopatigu ai'a koyapa koyapa koli mehuse minolatana molo leto'ehina bouba, to ai kumu hetofa kehelise'na limi'ehina bouba, Hu'mau ai ya'mamofihi hu lepalalibe luto nolube.